PRUEBA
Beharrezkotzat jotzen du emakumeen, gazteen, 55 urtetik gorakoen eta migratzaileen jarduera-tasa handitzea, gizarteratzearen eta laneratzearen bidez
Mikel Torres Lehendakariordeak eta Ekonomia, Lan eta Enplegu sailburuak Euskadiko lehiakortasunaren eta ongizatearen “motor” gisa ezarri du inklusioa, Enpleguaren Euskal Estrategia 2030 dokumentuan jasotzen den bezala. Era berean, adierazi du bere sailak, orain arte bezala, ildo horretan lan egiten jarraituko duela langabezia murrizteko eta enplegagarritasuna hobetzeko ekintzak eta programak sustatuz.
Orkestra – Lehiakortasunerako Euskal Institutuak Lehiakortasun Txostena aurkeztu du gaur Gasteizen, eta bertan Torresek azpimarratu du gizarteratzea “funtsezko faktorea” dela garapen ekonomikoa indartzeko. Lehendakariordeak azaldu du ildo horretan egindako azterketek Enpleguaren Euskal Legean agindutako helburuak lortzen laguntzen dutela.
“Egiazkoa eta objektiboa den informazioa izatea tresna baliagarria da Euskadi indartzen jarraitu behar den bidea zehazteko eta hainbat alderditan aurrera egiten laguntzeko; hala nola, belaunaldien arteko erreleboan, prestakuntzan, desberdintasunen murrizketan, baita talentuaren ihesa iraultzeko ere, eta talentu hori lurraldeko enpresetara erakartzeko edo atxikitzeko”, ziurtatu du.
Horretarako, beharrezkotzat jotzen du emakumeen, gazteen, 55 urtetik gorakoen eta migratzaileen jarduera-tasa handitzea, gizartean eta lan-merkatuan integratuz, eta generoaren, jatorriaren edo adinaren ondoriozko joerak hautsiz, “balio-sortzaileak” direlako: “Ez ditugu pertsona horiek atzean utzi behar. Lan-merkatuan sartzeko gai izan behar dugu”.
Lehiakortasunari buruzko txostena
2019tik, urtero egiten da Orkestraren Lehiakortasun Txostena. Euskadiren lehiakortasunari buruzko erronkak aztertzen eta identifikatzen ditu dokumentu horrek, joerak, aukerak eta mehatxuak hautematen ditu, eta eztabaidetan eta erabakiak hartzeko prozesuetan eragiten du.
Edizio honetan, 66 adierazleren emaitzak aztertu dira, euskal lehiakortasunaren esparruan oinarrituta. Aldi berean, inklusioak lehiakortasunari eta ongizateari eusteko duen garrantziari buruzko hausnarketa kontzeptuala eta hiru dimentsioko azterketa enpirikoa uztartu ditu, sorlekua, generoa eta adina aztertuz.
