Inklusioa, familia-kontziliazioa eta hezkuntza-berrikuntza sustatzeko konpromisoa berresteko, Bilboko Udaleko Hezkuntza Arloak 250.300 euro bideratuko ditu 2025ean hezkuntzan laguntzeko eta eskola-igeriketan laguntzeko programetara.
Ildo horretatik, otsailaren 21era arte egongo da zabalik interesa duten erakundeek hezkuntzari laguntzeko jarduerak eta ekimenak egiteko laguntzak eskatzeko epea, jarduera eta ekimen horiek familia eta lana bateragarri egiten laguntzeko, ikasleen parte-hartzea eta topaketa bultzatzeko, eta bizikidetza, elkartasuna eta integrazioa bezalako balioak sustatzeko.
Berrikuntza gisa, aurten eraberritzea sustatzen duten programak edo proiektuak diruz lagunduko dira, bokazio zientifiko-teknologikoak, STEAM hezkuntza eta kultura zientifiko-teknologikoa zabaltzeko eta sustatzeko ekintzak bultzatzeko. Era berean, proiektuak lehenestean, irizpide berri bat sartzen da: ikastetxe publikoetako proiektuak lehenetsiko dira eskola itunpekoen aurretik, puntuazioan berdinketa egonez gero.
Eider Bilbaok, Bilboko Udaleko Hezkuntza zinegotziak, nabarmendu du Hezkuntza Arloak hezkuntza-sarearekin duen konpromiso irmoari eusten diola, «hezkuntza-komunitate osoari prestakuntza- eta kontziliazio-alternatibak eskainiz, ikastetxeetan inklusio, parte-hartze eta berrikuntza handiagoa ahalbidetuko duten proiektuak lehenetsiz, eta familiei hezkuntzari laguntzeko programetarako sarbidea erraztuz, ahalegin ekonomikorik eragin gabe».
Azaldu duenez, «ikasturte honetan bi berrikuntza ditugu, hezkuntza-eraberritze sustatzea helburu dutenak, gazteek mundu zientifiko-teknologikoan eskola-orduetatik kanpo barneratzeko aukera izan dezaten; eta hezkuntza publikoari ematen zaion laguntza indartzea, funtsezko zutabe gisa, ikastetxe publikoek aurkeztutako proiektuak lehenetsiz puntuazioan berdinketa egonez gero».
Horrela, hezkuntzari laguntzeko programetarako aurrekontua 140.300 eurokoa izango da, eta igeriketa sustatzeko programetarako aurrekontua 110.000 eurokoa. Era berean, hezkuntza-premia bereziak dituzten ikasleen inklusioa bultzatzen duten programetarako laguntzak handitzen jarraitzearen alde dago arloa.
HEZKUNTZARI LAGUNTZEKO PROGRAMAK
Horrela, ikastetxeen jarduera eskola-orduetatik kanpo indartzeko eta familia eta lana bateragarri egiten laguntzeko, bai eta IGEen prestakuntza ere, hezkuntzari laguntzeko programetarako aurrekontuan eskolaz kanpoko eta bestelako jarduerak sartzen dira, ikasleen ikuspegi artistiko-kulturala eta kirolekoa zabaltzeari buruzko alderdietan prestakuntza integrala emateko.
Partida honetan diruz lagundu daitekeen kontzeptuari 500 euro gehiago gehituko zaizkio, baldin eta garatu beharreko jardueren artean hezkuntza-premia bereziak dituzten ikasleen inklusioa sustatzera eta parte-hartzea erraztera bideratutako jardueraren bat badago.
Gainera, laguntzen xede diren kolektiboek elkarrizketaren balioa, bizikidetzaren balioa, elkartasunaren balioa, ikasleen integrazioa eta/edo ikasle etorkinen harrera sustatzen dituzten proiektuak jaso ahal izango dituzte.
Lehen adierazi den bezala, berrikuntza gisa, aurten jarduera-ildo berri bat sortu da, zeinaren bidez berrikuntza sustatzen duten programak edo proiektuak ere diruz lagunduko baitira, bokazio zientifiko-teknologikoak, STEAM hezkuntza eta kultura zientifiko-teknologikoa zabaltzeko eta sustatzeko ekintzak bultzatzeko.
ESKOLAKO IGERIKETA SUSTATZEKO PROGRAMA
Dirulaguntzen programa bat da, Bilboko Lehen Hezkuntzako ikastetxe publikoetako ikasleen artean igeriketa egiten laguntzeko, ikasturtean zehar, hezkuntza-premia bereziak dituzten ikasleak ere kontuan hartuta. Helburua da ikasleen artean jarduera fisikoa eta kirol-jarduera sustatzea.
Udal dirulaguntzen programarako eskabideak Bilboko Udalaren webgunean (www.bilbao.eus) edo Herritarrei Arreta emateko Udal Bulegoetan aurkeztu ahal izango dituzte interesa duten erakundeek.
Tramitazioa errazteko eta zalantzak argitzeko, telefonoz ere egin daitezke kontsultak, 944.010.010 / 010 telefonora deituta, 08:00etatik 20:00etara.
