Barakaldo beti izan da jatorri desberdineko pertsonen arteko elkarbizitzaren adibide. Udalerri inklusibo bat eraikitzen jarraitzeko asmoz, Gizarte Kohesioaren arloak forma eman dio Aniztasunaren Eskolaren zortzigarren edizioari. Carlos Fernández bigarren alkateordeak eta Nuria Rodríguez zinegotzi delegatuak aurtengo urria eta 2025eko martxoa bitartean Clara Campoamor Gizarte Etxean egingo den programazioa aurkeztu dute gaur.
«Aniztasunaren Eskola topagune gisa sortu zen, gizarteak dituen erronka nagusietako bati buruz hausnartzeko, kulturartekotasunari buruz, alegia. Azken urteotan, ekimen horri esker, esperientziak eta prestakuntza trukatu zaizkie Barakaldo inklusiboago baten eraikuntzan inplikatutako eragile komunitarioei, eta lan-ildo horretan jarraitu nahi dugu «, deskribatu du Carlos Fernandezek.
Mintegi guztiak 18:30etik 20:00etara egingo dira Clara Campoamorren, eta arratsaldea girotzeko, hitzaldi bakoitzean tea pastekin zerbitzatuko da. Bertaratzea sustatzeko beste modu bat da, «gure udalerriko kultura ezberdinez bustitzeko», azaldu du Fernandezek.
Urriaren 17an hasiko da Rubén Lasheras, Nafarroako Unibertsitate Publikoko Soziologia eta Gizarte Laneko Departamentuko irakasle eta ikertzailea, desberdintasunei, gizarte-bazterketari eta horiek eguneroko kulturen arteko bizikidetzan duten eraginari buruz hitz egiten. Azaroan, hilaren 19an, gaurkotasuneko gai baten txanda izango da: Kanarietako migrazio-arazoa. Loueila Sid Ahmed Ndiaye jatorri sahararreko abokatu kanariarrak hartuko du parte.
Abenduaren 17an, «Gorroto diskurtsoaren ordezko narratibak» izango da mintzagai. «Handituz doan arazo soziala da, gizartea zatitzen du eta demokraziarentzat arrisku argia da. Diskurtso hori Europako herrialdeak zeharkatzen ari da azken urteotan, eta eskuin muturreko alderdi populisten gorakadaren eta haien mezu alarmista, iraingarri eta baztertzaileen hedapenaren ondorio da «, ohartarazi du Nuria Rodriguezek. Mintegian SOS Arrazakeria Gipuzkoako bi ordezkarik hartuko dute parte: Abdoulaye Sarr, Zuzenbidean lizentziatua eta erreferente heldurik gabeko gazte migratzaileei arreta emateko teknikaria, eta Itziar Gorostidi, Gizarte Hezkuntzan diplomatua, Hezkuntza eta Immigrazioan graduondokoa eta Pedagogia Terapeutikoan masterra.
ARRAZAKERIA KIROLEAN
Urtarrilean, zoritxarrez puri-purian dagoen beste gai bat jorratuko da: kiroleko arrazakeria. Alberto Edjogo-Owono, kirol komentarista eta futbol afrikarrean aditua den futbolari ohia (izan ere, gaiari buruzko liburu bat du) kirol esparruetako egungo egoeraz eta oraindik gertatzen diren oihu arrazistei aurre egiteko dauden erronkez arituko da.
Eta otsailerako beste gai garrantzitsu bat geratuko da: Gazako egoera humanitarioa, «Genozidio baten anatomia» izenburupean. Mintegian parte hartuko dute Felipe Gómez Isa, Deustuko Unibertsitateko Nazioarteko Zuzenbidean doktorea eta gaur egun ikastetxe horretako irakaslea, eta Bárbara Ruiz Balzola, UNRWA Euskadiko ordezkaria. UNRWA Palestinako Errefuxiatuentzako Nazio Batuen Agentzia da.
Aurrekoetan bezala, umorezko emanaldi batek itxiko du programazioa. Asaari Bibang izango da martxoaren 25ean «Humor negra» aurkeztuko duena. Arrazakeriaren aurkako bakarrizketa afrofeminista da, eta aktorea gai da Espainian emakume, beltz eta migratzaile izatearen berezitasunez zalantzarik gabe hitz egiteko.
Ekimen hauetan parte hartzeko beharrezkoa da aldez aurretik izena ematea amekadi@gmail.com helbidera mezu elektroniko bat bidaliz edo 670745032 telefonora deituz. Jarduera guztietan doako ludoteka zerbitzua dago.
